1ܐܵܚܘܿܢܘܵܬܝܼ̈؛ ܠܵܐ ܒܚܙܵܝܬܵܐ ܕܦܵܬܵܐ ܕܵܒܼܩܝܼܬܘܿܢ ܠܗܲܝܡܵܢܘܼܬܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܕܬܸܫܒ݁ܘܿܚܬܵܐ. 2ܣܵܒܵܒ ܐܸܢ ܐܵܘܸܪ ܠܟܢܘܼܫܬܵܘܟܼܘܿܢ ܐ݇ܢܵܫܵܐ ܡܵܪܹܐ ܥܹܙܲܩܬܵܐ ܕܕܲܗܒܼܵܐ؛ ܒܓ̰ܘܼ̈ܠܹܐ ܫܵܦܝܼܪܹ̈ܐ؛ ܘܐܵܘܸܪ ܡܸܣܟܹܢܹܐ ܒܓ̰ܵܘܼܠܹ̈ܐ ܫܸܚܬܵܢܹ̈ܐ؛ 3ܘܚܵܝܪܝܼܬܘܿܢ ܒܗ̇ܘ ܕܝܼܠܹܗ ܠܒܼܝܼܫܵܐ ܓ̰ܘܼܠܹ̈ܐ ܫܵܦܝܼܪܹ̈ܐ؛ ܘܐܵܡܪܝܼܬܘܿܢ ܠܹܗ؛ ܐܲܢ݇ܬ ܝܬܘܿܒܼ ܠܲܐܟܼܵܐ ܨܦܵܝܝܼ؛ ܘܠܡܸܣܟܹܢܵܐ ܐܵܡܪܝܼܬܘܿܢ؛ ܐܲܢ݇ܬ ܟܠܝܼ ܬܵܡܵܐ؛ ܝܲܢ ܝܬܘܿܒܼ ܠܲܐܟܼܵܐ ܬܚܘܿܬ ܟܘܼܒܼܫܵܐ ܕܐܲܩܠܝܼ̈؛ 4ܠܵܐ ܗ݇ܘܹܠܵܘܟܼܘܿܢ ܦܲܠܝܵܢܹ̈ܐ ܓܵܘ ܓܵܢܵܘܟܼܘܿܢ؛ ܘܗ݇ܘܹܠܵܘܟܼܘܿܢ ܕܲܝܵܢܹ̈ܐ ܡܵܪܹ̈ܐ ܚܘܼܫܵܒܼܹ̈ܐ ܒܝܼܫܹ̈ܐ؛ 5ܫܡܸܥܡܘܿܢ؛ ܐܵܚܘܿܢܘܵܬܝܼ̈ ܡܘܼܚܸܒܹ̈ܐ؛ ܠܵܐ ܓܘܼܒܹܠܹܗ ܐܲܠܵܗܵܐ ܠܡܸܣܟܹܢܹ̈ܐ ܕܐܵܗܵܐ ܥܵܠܡܵܐ (ܕܗܵܘܝܼ) ܕܵܘܠܲܬܡܲܢܕܹ̈ܐ ܒܗܲܝܡܵܢܘܼܬܵܐ؛ ܘܝܵܪ̈ܘܿܬܹ̈ܐ ܕܗ̇ܝ ܡܲܠܟܘܼܬܵܐ ܕܩܘܼܘܸܠܹܐ ܠܐܵܢܝܼ ܕܡܲܚܸܒܝܼ ܠܹܗ؛ 6ܐܝܼܢܵܐ ܐܲܚܬܘܿܢ ܡܘܼܣܠܹܠܵܘܟܼܘܿܢ ܠܡܸܣܟܹܢܹܐ. ܕܵܘܠܲܬܡܲܢܕܹ̈ܐ ܠܹܐ ܝܢܵܐ ܒܸܙܠܵܡܵܐ ܥܲܠܵܘܟܼܘܿܢ؛ ܘܐܵܢܝܼ ܒܸܓܪܵܫܵܘܟܼܘܿܢ ܠܒܹܝܬ ܕܝܼܘܵܢ؛ 7ܐܵܢܝܼ ܠܹܐ ܝܢܵܐ ܒܸܓܕܵܦܵܐ ܥܲܠ ܫܸܡܵܐ ܛܵܒܼܵܐ ܕܦܸܫܠܹܗ ܩܸܪܝܵܐ ܥܲܠܵܘܟܼܘܿܢ؛ 8ܐܝܼܢܵܐ ܐܸܢ ܢܵܡܘܿܣܵܐ ܡܲܠܟܵܝܵܐ ܬܲܡܘܼܡܹܐ ܝܬܘܿܢ؛ ܐܲܝܟܼ ܕܝܼܠܹܗ ܟܬܝܼܒܼܵܐ ܡܲܚܸܒܸܬ ܠܫܒܼܵܒܼܘܼܟܼ ܐܲܝܟܼ ܓܵܢܘܼܟܼ؛ ܫܵܦܝܼܪܵܐ ܒܸܥܒܼܵܕܵܐ ܝܬܘܿܢ. 9ܐܝܼܢܵܐ ܐܸܢ ܦܵܬܵܐ ܒܸܚܙܵܝܵܐ ܝܬܘܿܢ؛ ܚܛܝܼܬܵܐ ܒܸܥܒܼܵܕܵܐ ܝܬܘܿܢ؛ ܘܦܝܵܫܵܐ ܝܬܘܿܢ ܡܘܼܢܟܸܣܹܐ ܡ̣ܢ ܢܵܡܘܿܣܵܐ؛ ܐܲܝܟܼ ܥܵܒܼܪ̈ܵܢܹܐ ܥܲܠ ܢܵܡܘܿܣܵܐ. 10ܣܵܒܵܒ ܗ̇ܘ ܕܟܠܹܗ ܢܵܡܘܿܣܵܐ ܢܵܛܸܪ؛ ܘܒܚܲܕَ ܓ̰ܵܪܸܛ؛ ܠܟܠܵܝܗܝ ܦܸܫܠܹܗ ܓܘܼܢܵܗܟܵܪ. 11ܣܵܒܵܒ ܗ̇ܘ ܕܐَܡܝܼܪܹܗ؛ ܠܵܐ ܥܵܒܼܕܸܬ ܩܲܗܒܘܼܬܵܐ؛ ܗܲܪ ܗ̇ܘ ܐَܡܝܼܪܹܗ؛ ܠܵܐ ܩܵܛܠܸܬ. ܐܵܕܝܼܵܐ ܐܸܢ ܠܹܐ ܝܘܸܬ ܒܸܥܒܼܵܕܵܐ ܩܲܗܒܘܼܬܵܐ؛ ܐܸܠܵܐ ܒܸܩܛܵܠܵܐ ܝܘܸܬ؛ ܗ݇ܘܹܠܘܼܟܼ ܥܵܒܼܪܵܢܵܐ ܥܲܠ ܢܵܡܘܿܣܵܐ. 12ܗܲܕܟܼܵܐ ܗܵܘܝܼܬܘܿܢ ܗܲܡܙܘܼܡܹܐ؛ ܘܗܲܕܟܼܵܐ ܗܵܘܝܼܬܘܿܢ ܒܸܦܠܵܚܵܐ؛ ܐܲܝܟܼ ܐ݇ܢܵܫܹ̈ܐ ܕܒܢܵܡܘܿܣܵܐ ܕܐܲܙܵܕܘܼܬܵܐ ܗܕܝܼܪܹܐ ܝܬܘܿܢ ܠܸܦܝܵܫܵܐ ܕܝܼܢܹܐ. 13ܣܵܒܵܒ ܕܝܼܘܵܢ ܕܠܵܐ ܪ̈ܲܚܡܹܐ ܒܸܬ ܗܵܘܝܵܐ ܥܲܠ ܕܗ̇ܘ ܕܠܵܐ ܥܵܒܸܕ ܪ̈ܲܚܡܹܐ. ܪ̈ܲܚܡܹܐ ܒܸܥܒܼܵܕܵܐ ܝܢܵܐ ܫܘܼܒܼܗܵܪܵܐ ܥܲܠ ܕܝܼܘܵܢ. 14ܡܘܼܕܝܼ ܦܲܝܕܵܐ؛ ܐܵܚܘܿܢܘܵܬܝܼ̈؛ ܐܸܢ ܐ݇ܢܵܫܵܐ ܐܵܡܸܪ ܕܐܝܼܬ ܠܝܼ ܗܲܝܡܵܢܘܼܬܵܐ؛ ܘܦܘܼܠܚܵܢܹ̈ܐ ܠܲܝܬ ܠܹܗ؛ ܟܹܐ ܡܵܨܝܵܐ ܗܲܝܡܵܢܘܼܬܹܗ ܕܡܲܚܝܼܵܐ ܠܹܗ؛ 15ܘܐܸܢ ܐܵܚܘܿܢܵܐ ܝܲܢ ܚܵܬܵܐ ܗܵܘܝܼ ܫܘܼܠܚܵܝܹ̈ܐ؛ ܘܚܣܝܼܪܹܐ ܡ̣ܢ ܢܵܦܵܩ ܕܝܵܘܡܵܐ؛ 16ܘܐܵܡܸܪ ܐܸܠܵܝܗܝ ܐ݇ܢܵܫܵܐ ܡܸܢܵܘܟܼܘܿܢ؛ ܙܹܠ݇ܡܘܿܢ ܒܫܠܵܡܵܐ؛ ܫܚܘܿܢܘܿܢ ܘܣܒܸܥܡܘܿܢ؛ ܘܠܵܐ ܝܵܗ݇ܒܼܝܼܬܘܿܢ ܠܗ݇ܘܿܢ ܣܢܝܼܩܘܼܬܵܐ ܕܦܲܓܼܪܵܐ؛ ܡܘܼܕܝܼ ܦܲܝܕܵܐ؛ 17ܗܲܕܟܼܵܐ ܐܘܼܦ ܗܲܝܡܵܢܘܼܬܵܐ؛ ܐܸܢ ܠܵܐ ܗܵܘܝܼ ܠܵܗ̇ ܦܘܼܠܚܵܢܹ̈ܐ؛ ܡܝܼܬܵܬܵܐ ܝَܠܵܗ̇ ܒܢܲܦ̮ܫܘܼܗ̇. 18ܐܸܠܵܐ ܒܸܬ ܐܵܡܸܪ ܐ݇ܢܵܫܵܐ؛ ܐܲܢ݇ܬ ܐܝܼܬ ܠܘܼܟܼ ܗܲܝܡܵܢܘܼܬܵܐ ܘܐܵܢܵܐ ܐܝܼܬ ܠܝܼ ܦܘܼܠܚܵܢܹ̈ܐ. ܡܲܚܙܝܼ ܠܝܼ ܗܲܝܡܵܢܘܼܬܵܐ ܕܠܵܐ ܦܘܼܠܚܵܢܹ̈ܐ؛ ܘܐܵܢܵܐ ܒܸܬ ܡܲܚܙܸܢܘܼܟܼ ܗܲܝܡܵܢܘܼܬܝܼ ܒܝܼܸܕ ܦܘܼܠܚܵܢܝܼ̈. 19ܗܲܡܘܼܢܹܐ ܝܘܸܬ ܕܚܲܕَ ܝܼܠܹܗ ܐܲܠܵܗܵܐ؛ ܨܦܵܝܝܼ ܒܸܥܒܼܵܕܵܐ ܝܘܸܬ. ܐܘܼܦ ܕܲܝܘܹ̈ܐ ܟܹܐ ܗܲܡܸܢܝܼ ܘܪܵܓܕܝܼ. 20ܒܸܒܲܥܝܵܐ ܝܘܸܬ ܕܝܲܕܥܸܬ؛ ܝܵܐ ܒܲܪܢܵܫܵܐ ܒܵܛܝܼܠܵܐ؛ ܕܗܲܝܡܵܢܘܼܬܵܐ ܕܠܵܐ ܦܘܼܠܚܵܢܹ̈ܐ ܡܝܼܬܬܵܐ ܝَܠܵܗ̇؛ 21ܒܵܒܲܢ ܐܲܒܼܪܵܗܵܡ ܠܹܐ ܗ݇ܘܵܐ ܡ̣ܢ ܦܘܼܠܚܵܢܹ̈ܐ ܦܸܫܠܹܗ ܡܘܼܟܫܸܛܵܐ؛ ܕܡܘܼܩܪܸܒܼܠܹܐ ܠܐܝܼܣܚܵܩ ܒܪܘܼܢܹܗ ܥܲܠ ܡܲܕܒܚܵܐ؛ 22ܒܸܚܙܵܝܵܐ ܝܘܸܬ ܕܗܲܝܡܵܢܘܼܬܹܗ ܗܘܼܝܸܪܵܐ ܠܦܘܼܠܚܵܢܘܼ̈ܗܝ؛ ܘܡ̣ܢ ܦܘܼܠܚܵܢܹ̈ܐ ܗܲܝܡܵܢܘܼܬܹܗ ܦܸܫܠܵܗ̇ ܡܘܼܟܡܸܠܬܵܐ. 23ܘܦܸܫܠܹܗ ܬܘܼܡܸܡܵܐ ܟܬܵܒܼܵܐ؛ ܕܐَܡܝܼܪܹܗ؛ ܗܘܼܡܸܢܹܐ ܐܲܒܼܪܵܗܵܡ ܒܐܲܠܵܗܵܐ؛ ܘܦܸܫܠܵܗ̇ ܚܘܼܫܒܸܢܬܵܐ ܐܸܠܹܗ ܠܙܲܕܝܼܩܘܼܬܵܐ؛ ܘܕܵܘܣܬ ܕܐܲܠܵܗܵܐ ܦܸܫܠܹܗ ܩܸܪܝܵܐ. 24ܒܸܚܙܵܝܵܐ ܝܬܘܿܢ ܕܡ̣ܢ ܦܘܼܠܚܵܢܹ̈ܐ ܟܹܐ ܦܵܝܸܫ ܡܘܼܟܫܸܛܵܐ ܒܲܪܢܵܫܵܐ؛ ܘܠܵܐ ܡ̣ܢ ܗܲܝܡܵܢܘܼܬܵܐ ܒܢܲܦ̮ܫܵܗ̇. 25ܗܲܕܟܼܵܐ ܐܘܼܦ ܪܵܚܵܒܼ ܙܵܢܝܼܬܵܐ؛ ܠܹܐ ܗ݇ܘܵܐ ܕܡ̣ܢ ܦܘܼܠܚܵܢܹ̈ܐ ܦܸܫܠܵܗ̇ ܡܘܼܟܫܸܛܬܵܐ؛ ܟܲܕ ܩܘܼܒܸܠܵܐ ܠܓ̰ܵܣܘܿܣܹ̈ܐ ܘܒܐܘܼܪܚܵܐ ܐَܚܹܪ݇ܬܵܐ ܦܘܼܠܛܵܝܠܵܐ؛ 26ܣܵܒܵܒ ܕܵܐܟܼܝܼ ܕܦܲܓܼܪܵܐ ܕܠܵܐ ܪܘܼܚܵܐ ܡܝܼܬܵܐ ܝܠܹܗ؛ ܗܲܕܟܼܵܐ ܐܘܼܦ ܗܲܝܡܵܢܘܼܬܵܐ ܕܠܵܐ ܦܘܼܠܚܵܢܹ̈ܐ ܡܝܼܬܬܵܐ ܝَܠܵܗ̇.